凱晴媽媽：懷疑我冇問題　最緊要個囡

[youtube]oOLOCSi7TuI[/youtube]

【本報訊】轟動全港的女嬰被擄案進入第五天，案件疑點重重，半歲女嬰俞凱晴的下落更是撲朔迷離，警方反轉全港都無法找到女嬰母親口中的「拐子婆」，案件偵查焦點鎖定在女嬰父母身上，警方更封鎖女嬰母親的住所。昨天，女嬰的父母先後接受《蘋果》電話訪問，俞母聲言會懸紅50萬尋女，並且不在乎警方懷疑她，但問到女兒是否在生時，她的聲線顫抖起來。記者：莫家文　劉雲彪

[img]http://static.apple.nextmedia.com/images/apple-photos/apple/20131127/large/27la1p11.jpg[/img]
■女嬰被擄當晚，母親隨探員在九龍城現場搜索。

《蘋果》記者昨晚聯絡到女嬰俞凱晴的母親，她接受記者電話訪問，以下是她與記者的談話內容。

母：俞凱晴母親父：俞凱晴父親
記：B女𠵱家情況係點？
母：𠵱家都仲未搵到。
記：警方有冇同你講乜嘢？提供啲線索畀你？
母：都未知，盡力搵緊。
記：會唔會擔心B女會被運上大陸或其他地方？
母：會呀，好擔心呀！或者懸紅囉，但未同警方傾，𠵱家都係靠同朋友派傳單尋人。
記：警方有冇話邊類人做？
母：有講過可能係儍嗰啲囉，攞咗個女去湊幾日。
記：有冇呢類線索，揣測定有實質證據？
母：暫時都話搵緊啦，其實都冇（證據），𠵱家靠朋友，邊區朋友邊區幫手搵，我都好急，都好耐啦，好擔心佢生死。
記：你都擔心佢安危嘅，你相信B女仲在唔在生呢？
母：係呀，我唔……唔知（聲線顫抖），希望佢吉人天相啦。
記：有傳媒根據警方消息話係熟人做，你點睇？
母：好多可能都有，呢個情況乜嘢懷疑都有，乜嘢懷疑都係啱㗎，都唔知㗎，𠵱家咁大件事，歹徒都收埋個B啦！
記：其實警方有冇懷疑係你做呀？
母：我都唔係好在乎呢啲，我淨係在乎個女。
記：警方有冇盤問過你？
母：所有嘢都問晒，我知嘅嘢所有都講晒。
記：警方有冇懷疑你？
母：警方咩人都會懷疑（包括你在內？）包括我在內都唔係問題，其實懷唔懷疑我都唔係問題，我淨係掛住個女啫。
記：警方今日有冇搵你？
母：警方好盡力，暫時冇乜嘢，Hold住先，都係得個等囉，我或者會準備懸紅50萬，將會同警方傾吓。你幫我宣傳出去，幫到我，希望吸引到人攞番個B出嚟，𠵱家收埋喺邊都唔知，好無奈，冇乜嘢做到。
記：你有頭緒係邊個做？
母：冇頭緒，全香港巿民都幫到我，我好感激，其實乜嘢報道都冇所謂，我都唔睇新聞。
記：俞生接受訪時話呢幾日冇聯絡你喎，你會唔會自己一個承受覺得好辛苦？
母：唔係呀！（一齊解決問題？）係呀（一齊住喺新蒲崗？）係呀！希望報紙唔好亂寫，不過最重要係個囡，其他新聞我都唔在乎啦，只要唔好越描越黑，因為全部都唔係真嘅。
記：你哋其實係一齊住？
母：係。
記：俞生唔係有老婆同其他女友？
母：佢哋個啲已經係前妻嚟，我𠵱家心情暫時唔講啦。

[img]http://static.apple.nextmedia.com/images/apple-photos/apple/20131127/large/a0101a.gif[/img]

來源:[url]http://hk.apple.nextmedia.com/news/art/20131127/18526333[/url]